Un momento sumamente importante pa HOH y comunidad
Hospital cu orguyo a efectua reapertura ceremonial di su entrada principal
Cu hopi orguyo y expectativa, riba diamars 31 di maart Horacio Oduber Hospital (HOH) a celebra e reapertura ceremonial di su entrada principal. Despues di un periodo di renobacion intensivo di e entrada principal cu a dura no menos cu cinco aña a tuma luga e momento historico unda tur partner a corta e cinta como simbolo di perseverancia y cooperacion cu awe por tin un facilidad moderno y eficiente cu ta eleva e experencia di pashentnan y bishitantenan.
Gregory Croeze, miembro di Hunta di Directiva di HOH, a dirigi su mes na e publico y a enfatisa e importancia di e momento aki. “E reapertura ta cumpli cu e mision principal di e hospital pa ta mas accesibel. E ceremonia simbolico di awe di habri e entrada principal ta restaura un sentido di familiaridad pa e comunidad di Aruba, combina cu un aire nobo moderno y eficiente.
E renobacion di e entrada principal no tabata simplemente un cambio estetico, sino un transformacion completo. E infrastructura a keda completamente renoba pa acomoda e necesidadnan actual di un hospital di e siglo 21, unda e fluho di pashentnan y bishitantenan por wordo maneha mas efectivamente y den un ambiente mas agradabel. E hospital a logra un balansa entre nostalgia di e structura original y e exigencianan di cuido di salud contemporaneo.”, Croeze a termina bisando.
E entrada principal lo ta habri diariamente entre 6am te cu 8.15pm, pero por keda haci uzo di e entrada di Area A cu ta keda habri pa por ehempel servicio na endoscopia, wondpoli, revalidatie y functiekamer. Ademas, den algun siman e cafetaria lo tin un “soft opening”, creando un luga pa descanso y nutricion den e area di entrada. E Deli ta operacional caba, ofreciendo un servicio rapido pa e coleganan y bishitantenan. Un elemento crucial ta e Balie di informacion cu a muda bek, sirbiendo como e prome punto di contacto pa registra si t’ey pa bishita un ser keri cu ta admiti den HOH. Tambe nan t’ey pa brinda orientacion y asistencia necesario. Ademas di e facilidadnan diario, lo muda su International Patient Office (IPO) pronto na entrada principal fortificando mas ainda e posicion di HOH como un entidad importante den region.
Na final di e ceremonia Hunta di Directiva di HOH a otorga na Prome Minister, sr. Mike Eman, Minister di Salubridad, sra. Mervin Wyatt-Ras y tambe Presidente di Hunta di Directiva John Hodgson un di e 125 tegelnan cu a logra rescata di e camber di operacion biew como muestra simbolico di historia y continuidad. Tambe a gradici y reconoce e esfuerso colectivo cu a haci e proyecto aki un exito. Un danki na tur colega di hospital cu a traha incansablemente, demostrando un compromiso cu ta yega mas leu cu nan deber, y a enfatisa cu nan no ta core pa reto, pero ta traha riba esakinan.
Tambe no por keda sin gradici Hunta di Supervision, Gobierno di Aruba como propietario di e edificio, tambe SOGA pa e cooperacion y sosten continuo y tur otro stakeholder cu a haci e proyecto aki posibel.
E reapertura aki ta confirma e compromiso continuo di HOH pa ofrece cuido di calidad halto den un ambiente moderno y accesibel. HOH ta gradici henter comunidad pa nan pasenshi y comprension durante e periodo di renobacion y construccion. Masha pabien HOH y Aruba!