Un colega profesional cu wowo skerpi pa detaye
Euwald Cicilia ta empleado di luna di maart 2026 na HOH
Tur luna Horacio Oduber Hospital (HOH) ta elogia un colega cu di un forma of otro ta destaca y pa luna di maart 2026 a toca turno na Euwald Cicilia. Euwald tin 3 aña ta traha na HOH como colega di e team tecnico cu ta traha riba aparatonan medico. Ora ela drenta un supuesto reunion pa sorpresa ela mira su famia para eynan hunto cu coleganan, management y hunta di directiva. Claro cu ela ripara di biaha cu e reunion tabata dedica na dje. Cu bunita palabranan tocante e dedicacion cu e tin pa cu HOH a celebra e momento inespera y festivo aki cu nunca elo lubida.
Euwald su nominacion basa riba e balornan TRUSTED di Hospital a wordo entrega pa su team, manager y tambe un compania externo cu a reconoce su empeño durante un proyecto grandi. E ta un berdadero teamplayer cu ta coopera cu su coleganan y ta contribui na un ambiente positivo di trabou. E ta un tecnico profesional cu semper ta cumpli y ta traha na un manera responsabel. Un colega respetuoso cu ta comunica y scucha bon cu ta hiba na yega na resultadonan efectivo pa problemanan tecnico. Eskai semper den bon colaboracion y cu confiansa. Euwald ta un persona practico cu no sa keha y cu tin seguridad halto como prioridad den su trabounan. Su conocemento tecnico, su pasenshi, wowo skerpi pa detaye y capacidad pa resolve problema ta haci cu su trabounan semper ta consistente y di calidad halto.
Niun trabou ta chikito of mucho grandi pe, sea ta mantencion, drecha fayo of reparacion. E ta zorg pa enfermeranan y specialista por conta riba dje pa aparatonan medico funciona manera debe ser pa sea informacion y/of diagnostico corecto di pashent. Ekipo cu Euwald ta traha mastanto riba dje ta na departamento di mucha, camber di operacion y cuido intensivo. Pa e proyecto di implementacion di HiX e tambe a percura pa tur informacion di cada aparato a wordo yena y configura den e sistema nobo. Un trabou cu a tuma hopi tempo di preparacion y dedicacion unda cu hasta e compania Hulandes ChipSoft a reconoce su balor pe team.
Su talento y profesionalismo ta haci cu Euwald tin un tremendo balor pa su team y tambe e ta contribui di forma indirecto na e cuido di pashent y tambe Hospital. Hunta di directiva y team completo di HOH ta contento cu Euwald ta forma parti di team HOH y ta felicit’e pe bunita reconocemento como empleado di luna di maart 2026. Masha pabien!