E persona tras di e slogan Nos semper t’ey cu ta stima su trabou
Jesseline Leon-Tromp ta empleado di luna di november 2023 na HOH
Team di comunicacion y mercadeo di Horacio Oduber Hospital (HOH) totalmente den secreto a organisa un ‘surprise act’ durante e evento di eleccion di reina di HOH. A pidi e departamento completp pa traha durante e evento y meymey di e programa a sorprende colega Jesseline (Jessy) Leon- Tromp cu e bunita reconocemento di empleado di luna di november. Ela keda masha sorprendi ora riba e screen riba stage su nieta a ‘pop-up’ den un video y a invite pa subi stage paso ta bay pone un rato den ‘spotlight’. Un gran sorpresa cu nunca elo lubida unda cu ful su famia a aparece y hunto cu hopi colega di HOH y Hunta di Directiva a celebra e tremendo momento aki.
Jessy tin mas di 30 aña ta traha na Hospital. Jessy ta diseñador grafico na Hospital y e ta un colega indispensable pa su departamento pero sin duda tambe pa Hospital completo. Tur hende conoce Jessy na HOH y sa tambe cu semper por pasa cerca dje si tin cualkier pregunta. Su porta semper ta habri y e semper ta dispuesto pa yuda sin importa dia ni ora y ta cumpli cu su trabou. E descripcion di su funcion nunca lo describi kico berdaderamente e ta haci na HOH. E ta un colega cu ta bay ‘above & beyond’ pa realisa trabounan pa HOH, colega, pashent y bishitantenan. E ta entre otro un colega creativo, semper yena di entusiasmo, dedica, traha cu pasion, e ta integro y tin hopi talento. Jessy ta bin cu idea pa campaña, ta scirbi poesia, ta canta pero tambe por convence e coleganan mas dificil pa participa na actividadnan. Hasta awo durante luna di december Jessy a bira HOH su Santa personal!
Charlaine Huntington, manager di departamento di comunicacion ta orguyoso paso “Jessy ta e persona cu a bin cu e slogan tan conoci di Hospital ‘NOS SEMPER T’EY’. No solamente mi ta contento cu ela bin cu e idea, pero e mes ta bib’e tambe diariamente. Hasta durante su vakantie e ta bin toch pa caba cu proyectonan y ta haci esaki cu mil amor.” Pues semper por conta riba dje. E ta integro y ta sinti un responsabilidad grandi pa su trabou. E tin e actitud di ‘do it’ y ta tuma feedback tambe pa asina e cliente ta feliz cu e produccion final di su trabou. Un persona positivo, proactivo y ta haci lo maximo posibel pa un proyecto sali exitoso.
Durante tur su añanan na HOH y diferente ‘ups-and-downs, keto bay Jessy ta un colega leal cu ta stima su trabou y cu ta stima Hospital. E ta HOH su embahadora y defensora riba caya, y e curason y alma tras di Nos semper t’ey. Hunta di Directiva, management y coleganan tur ta hopi contento cu Jessy semper t’ey. Pabien Jessy cu un bunita y reconocimento bon mereci!