Hospital trahando awo cu dossier medico digitalisa

January 29, 2018

Inovacion grandi den forma di traha pero cu calidad di cuido den mente.

ORANJESTAD, Aruba – 29 di Januari 2019: Desde aña pasa Dr. Horacio E. Oduber Hospital a duna di conoce cu e policlinicanan di specialista a bay over riba digitalisacion di dossier medico di cada pashent. Awo a toca turno na Hospital mes pa bay over na digitalisa tur informacion di pashent na momento cu nan bishita Hospital, pues e tan conoci map blauw ta pasa pa pasado. E digitalisacion a cuminsa diasabra 19 di januari pa 8am na departamento di emergencia y poco poco a sigui pa tur departamento den Hospital. E pashentnan cu ta yegando hospital den e dianan aki mester tene cuenta cu e servicio por tarda un tiki pasobra nan ta siñando y custumbrando cu un sistema nobo, Marilu Koolman a duna di conoce. E cambionan aki ta pa eleva e calidad di cuido y alabes siguridad y p’esey ta pidi un tiki pasenshi.

E proyecto aki ta carga e nomber IMP@CT cu ta nifica “Improving Patient Care through Technology”. A cuminsa cu e proyecto aki algun aña atras, unda cu na prome luga tabata importante pa involucra personanan cu ta traha den hospital y directamente cu e pashentnan. A involucra nan pa motibo cu nan sa con e proceso ta y asina e team di proyecto IMP@CT tabata analisa cua tabata e miho manera pa digitalisa esakinan. E proceso aki a dura 2 pa 3 aña, pero na Juni 2018 a cuminsa cu e cambio aki na e policlinicanan unda a cuminsa digitalisa pa por yena e dossier di pashent. A cuminsa cu nan pa asina ora e parti clinico bay “live” ya caba tin basta informacion den e dossier, segun Marilu Koolman, projectleider IMP@CT.

Tur e cambio aki ta nifica cu na momento di yegada di e pashent na Hospital, lo haci varios pregunta pa asina yena e pashent su historia den e sistema. No solamente lo yena e informacionnan personal, pero tambe e historia medico. Ta haci esaki pa ora cu e pashent yega Hospital siguiente biaha ya caba e informacionnan ta hinca den e sistema digitalisa. No lo haci pregunta cada biaha pero simplemente controla esaki. Antes cada bes cu tabatin un dokter nobo, e pashent mester a conta su historia medico completamente di nobo. Awo cu e sistema aki e informacion ta disponibel pa tur dunado di cuido trahando den hospital.

Na momento cu un pashent yega por ehempel Departamento di Emergencia y su informacion ta den e sistema, e nursenan por mira si e tin algun alergia pa cierto remedi y asina ta tene cuenta cu esey. Aki por mira si e persona a yega di opera y kico e situacion tabata mirando henter e historia medico. E cambio aki ta uno grandi p’e empleadonan y pashentnan na momento cu nan yega hospital. E cambio aki ta grandi p’e empleadonan cu tin hopi aña di experencia, kendenan ta custumbra skirbi na man. Nan a haya hopi training pa bay na e sistema digitalisa, pero na cuminsamento e lo tuma hopi tempo pa custumbra cu esaki.

Ta gradici e team grandi di hospital cu a haci esaki un realidad, cuminsando cu e team di proyecto IMP@CT pa tur nan dedicacion y tambe henter e personal di hospital di cuido cu ta nursenan, dokternan y tur personal di cuido cu a yuda diseña y test e sistema, a yuda duna training na nan coleganan y mucho mas. Ta gradici CERNER cu ta e compania cu a provee e sistema y a guia e durante e 3 añanan di proceso. Y por ultimo Hunta di Directiva pa e confiansa duna desde principio na un proyecto asina grandi y importante pa cuido medico.

Scroll To Top