Den cuadro di celebracion di e prome lustro di e Team di Calamidad di Hospital a tuma e iniciativa pa organisa e “Aruba’s 1^st Safety and Security Conference” cual a surpasa tur expectativa.  Un total di 179 participante a forma parti di e prome conferencia organisa den cuadro di siguridad den un organisacion.  Por a gosa di un total di 22 orador, di cual 3 tres tabata di exterior. E meta primordial di e conferencia aki tabata pa conscientisa e diferente organisacionnan participante cu e tema di “Safety and Security” ta encera mucho mas di locual ta pensa y alabes ta toca mucho mas instancia di locual ta kere.

 

E mainta a habri cu un palabra di bon bini di e presidente di Hunta di directiva di Hospital, señor Arnoud Boesten, sigui pa Minister di Husticia y Enseñansa mr drs. Arthur Dowers. Despues a tuma luga diferente sesionnan tocante siguridad den salubridad, enseñansa, sector priva y tambe fundacionnan. Tambe tabatin diferente stand cu a presenta nan productonan durante e conferencia y hasta por a haci test di sanger gratis cerca Laboratorio Familiar.  No por keda sin menciona e mini workshop  cu a ser duna pa  señor Ralph Kronieger  di Hulanda y señor Fred LeBlanc di Merca cual a causa hopi entusiasmo bou di e participantenan. Despues di dos dia intensivo a clausura e conferencia cu un “After Conference Networking event”  compaña pa Wine and cheese.

 

Comision organisado ta hopi contento di por menciona cu 72% di e participantenan a score e conferencia cu e cifra di 8.2. Esaki sigur ta un estimulo pa un biaha mas ripiti e conferencia aki basa riba siguridad. Por ultimo e grupo di e Team di Calamidad di Hospital a crea un e-mail pa asina mantene contacto. Pa es motibo ta pidi  tur cu a atende e conferencia pa registra y manda un e-mail cu dato pa ERTAruba@gmail.com pa asina comparti diferente documento y conocemento.  

Di parti di e comision organisado di Hospital ta extende palabra di gratitud na tur companianan cu a participa, participantenan individual, tur sponsor y tambe esunnan cu a haci donacion substancial cual a haci e evento aki uno exitoso.