E clinica di Dialisis di Dr. Horacio E. Oduber Hospital ta ofrece diferente tratamento pa reemplasa funcion di riñon pa pashentnan di riñon. E tratamentonan ta tuma luga tanto na cas como na hospital. Si bo riñonnan ta funciona menos cu 10%, bo ta yega na remarca pa dialisis. Durante e tratamentonan di dialisis tur residuo, exceso di salo y likido, ta wordo saca for di bo curpa, pero no pa e riñonnan mes manera ta pasa den un proceso natural. Esaki ta sosode pa medio di un likido di spula special (dialysaat), y un riñon artificial cu membrana semi-permeabel (na hemodialyse) of pa bo mesun bariga (na dialisis peritoneal).
Bo kier sa con esaki ta tuma luga exactamente, primi riba e linknan akibou:
Den un periodo prome cu e dialisis, e “periodo predialisis” bo ta wordo mas miho posibel prepara pa e dialisis. E enfermero di predialisis y e nefrologo ta studia cua tratamento ta pas miho cu bo. E enfermero predialisis ta keda informa bo riba e diferente formanan di dialisis.
Ora di dialisis peritoneal ( spula pa bariga) e sanger ta wordo purifica pa medio di likido den e abdomen. Pa medio di un slang chikito permanente den e bariga, ta hinca likido di dialisis den e abdomen. Pa medio di e flishi di bariga, residuo for di den e sanger ta wordo transporta pa e likido di dialisis den e abdomen. E spulamento via bariga of dialisis peritoneal ta tuma luga tur dia na cas, sea den dia of anochi. E enfermero di dialisis cu ta traha riba e departamento peritoneal lo guia bo cu e dialisis peritoneal. E ta siña bo con pa haci e tratamento aki bo mes y ta sigui guia bo durante e tratamento. Semper bo por haci un apelacion riba e enfermero aki sea durante of fuera di su orario di trabou.
Ora di hemodialyse e sanger ta wordo purifica pa un riñon artificial y un mashin di dialisis pa medio di un entrada pa e circulacion di sanger (cu hangua of slang chikito) cu ta saca e sanger di e curpa pa despues e mashin di dialisis pomp e pasele dor di e riñon artificial. Esaki ta tuma luga den e clinica di dialisis, mayoria biaha 2 pa 3 bes pa siman, durante mas o menos 4 ora. Durante e tratamento bo ta wordo guia pa e enfermero di dialisis of pa e assistent di dialisis.
Den caso cu bo yega na remarca pa un transplantacion di riñon, esaki ta keda efectua den Centro Medico Academico na Amsterdam. Preparacionnan y informacion riba esaki, ta tuma luga aki na Aruba.