Hospital desde prome di juli cu algun cambio na momento di registracion

 

Algun dia pasa a actualisa e sistema di registracion di Hospital. Pa mantene e validez di e informacion cu ta registra ta depende di e informacion cu Hospital ta obtene di su pashentnan. Pa logra esaki Hospital kier recorda tur hende ki documentonan mester presenta na momento di registra na Hospital.

 

Mescos cu na cualkier otro parti di mundo, nos conoce for di punto di bista di registracion diferente categoria di pashent. Na Aruba nos conoce e siguiente categorianan:

1.       Pashent cu ta ser cubri pa AZV

2.       Pashent cu no tin seguro di AZV, pero ta biba na Aruba

3.       Pashent cu no ta biba na Aruba

 

Pashent cu ta ser cubri dor di AZV manera ya conoci ta presenta cu nan carchi di AZV valido y nan ID valido. Ora ta trata di un pashent menor di edad semper ta bon pa un di su mayornan ta presente; mayor ta presenta cu e carchi di AZV di e mucha y e ID di e mayor.

Pashent cu no tin AZV pero ta biba na Aruba mester presenta e siguiente documentonan:

·         Un ID di Aruba of

·         Un copia di permiso valido (estadia of trabao) of

Den caso cu e pashent tin un seguro particular ta bon pa e pashent trece tambe e documento di e seguro cu su number di polisa valido.

Pashent cu no ta biba na Aruba mester trece nan paspoort y si tin un seguro den exterior lo ta bon pa trece e carnet cu number di polisa riba dje.

 

E reglanan aki ta valido pa tur tipo di servicio di hospital entre nan pa Opname, Revalidacion, Departamento di emergencia como tambe oficinanan de specialista di Hospital.

 

Manteniendo bo mes na reglanan pa registracion di Hospital, e pashent ta colabora cu e sistema automatico cu di otro banda ta aporta na un miho forma pa duna informacion di pashent na un manera corecto, completo y na e dunado di cuido adecuado riba e momento necesario. Di e manera aki Hospital ta sigui traha duro pa logra un miho nivel di cuido y servicio na pashentnan di Aruba.