Jessy posted on June 29, 2011 16:15
Resultado sumamente positivo pa cu e amabilidad y profesionalidad
Encuesta “Duna bo opinion” di Hospital ta kibra record durante 2010
Cu hopi orguyo a duna di cuenta despues cu a registra tur resultado di e encuesta di Hospital “Duna bo opinion” di aña 2010 cu nos pashentnan ta contento cu e servicio di Hospital. Un total di 2393 encuesta e ser entrega durante aña 2010 pa e diferente departamentonan di cuido y a registra cada un di nan pa asina tin un miho bista kico nos pashentnan ta pensa di e servicio, higiena, cuminda, enfermeria y tambe specialistanan.
Importante pa menciona ta cu e encuesta aki ta totalmente anonimo y e resultadonan ta un promedio di e opinion di tur pashent cu ta participa. Cada trimester ta tuma e tempo y registra e resultadonan ricibi y ta manda esakinan pa e diferente hefenan di cuido , Hunta di directiva di Hospital y alabes ta publica e resultadonan den e revista special pa personal di Hospital. Esaki como meta pa asina traha pa diariamente mehora e servicio na nos pashentnan.
Na aña 2010 e opinion general di e pashentnan cu a participa entre un escala di 1 pa 5 tabata un 4.2 compara cu e score di 2009 cu tabata 4.3. Un score sumamente positivo pa cu e servicio en general di Hospital. Tambe no por keda sin menciona cu na aña 2009 pashentnan no tabata contento cu e orario di bishita. Y na 2010 Hunta di directiva hunto cu e Hefenan di cuido a yega na un acuerdo pa haci un cambio den esaki. Awo por mira e frutonan di e cambio aki paso e score di orario di bishita a mehora enormemente.
Algo cu Hospital ta sumamente orguyoso di dje ta e servicio duna pa e team di enfermeronan cu ta labora na Hospital. Hopi pashent ta mira con duro nan ta labora y alabes ta duna nan opinion bisando cu nan ta hopi profesional, amabel y alabes ta gradici nan inmenso pa a cuido duna for di admision te cu salida for di Hospital.
Hospital ta pidi encarecidamente na tur cliente pa sigui yena e encuesta “Duna bo opinion” pa asina por keda na altura kico cada pashent ta pensa di e servicio, trato, higiena y mucho mas. Yenando e encuesta cada pashent por haci e diferencia den e servicio di Hospital, paso cada pashent ta central.