Jessy posted on June 17, 2011 16:13
Pashent ta siña tuma control di su diabetes
Hospital contento cu e profesionalismo brinda pa Policlinica pa diabetes
Na Aruba tin hopi hende cu ta sufri di e malesa di diabetes y segun añanan a pasa e totalidad di pashent a subi bastante. E gran mayoria di hende por wordo trata pa un Dokter di cas. Asina mes tin hopi hende cu nunca ta yega na un sucu bon regla. Un sucu ku ta keda halto pa hopi aña ta daña e nervionan, e riñon, e wowo y e adernan.
Na dr. Horacio E. Oduber Hospital nos ta wak diariamente e complicacionnan cu diabetes ta trece cu ne manera amputacion di pia of dialisis. Pa motibo ey Hunta di directiva di Hospital a tuma e iniciativa pa cuminsa cu un Policlinica specialisa pa hende diabetico. Durante e ultimo dos añanan Dr. Hoogendam conhuntamente cu otro internista y un enfermera specialisa den diabetes a cuminsa diseña un Policlinica specialisa den e cuido di pashent cu ta sufri di diabetes.
Un di e puntonan cu specialista ta riparando ta cu e pashent ta bin consulta algun bes y despues e no ta bin mas. E problema di esaki ta cu pa trata e sucu bon, un pashent mester siña un estilo di bida nobo y esey no ta pasa di un dia pa otro sino e ta dura algun tempo. Si un pashent bin consulta algun bes so e no lo bay yega nunca na un sucu bon regla. P’esey nos a traha riba un plan di tratamento cu tin un duracion di mas o menos 3 luna. Despues di e periodo ey un pashent tin tur e hermentnan den man pa cuida su sucu. Locual tambe e lo ricibi ta informacion con pa biba un bida saludabel cu diabetes. Despues di e tratamento di 3 luna ta haci un evaluacion cu e pashent y si tur cos a bay bon e por sigui cu su Dokter di cas.
Na momento cu un pashent ricibi un verwijsbrief pa e Policlinica pa diabetes e prome cos cu ta sosode ta un combersacion pa admision conhuntamente cu un examen completo haci pa e internista y e enfermera specialisa den diabetes. Durante e prome bishita lo wak kico tur e pashent sa di e malesa diabetes pa asina por traha un trayecto personal. Despues di e prome bishita e pashent lo mester pasa pa controla cada 1 of 2 siman. Cada bishita lo tin un enfoke diferente manera estilo di bida, medicina y e complicacionnan.
Ta importante pa splica cu tin un diferencia entre e Policlinica pa diabetes y e Centro pa salud. E diferencia ta cu na e Policlinica por haya cita solamente cu carta di referencia di Dokter di cas. E Policlinica t’ey specialmente pa hende cu tin un diabetes cu ta mas dificil pa trata of si e pashent tin algun complicacion cu a surgi di e diabetes y e Dokter di cas ta pidi e ayudo. Mirando cu entre e internista y e enfermera specialisa den diabetes ta stipula un plan di tratamento pa e pashent por sigura cu e pashent lo ricibi un tratamento integral.
Na es momentonan aki tur siman ta drenta a lo menos 5 pashent nobo y mester menciona cu e resultadonan di e tratamento ta exitoso. Pa obtene e miho resultado ta importante pa e pashent sigui e tratamento stipula pa asina e ricibi tur e informacion y atencion necesario relaciona cu e malesa.
Hospital ta sumamente contento cu e profesionalismo di e Policlinica aki y alabes e exito cu ya e la cosecha caba entre e pashentnan cu ya a bishitanan. Y mirando cu e pashent ta central pa dr. Horacio E. Oduber Hospital ta spera cu den futuro por integra cu e prome linea di cuido, por ehempel Centro Diabetico y alabes tambe por brinda ayudo na esunnan cu tin e necesidad durante 24 ora pa dia.