Jessy posted on June 10, 2011 16:12
Pa por brinda mas y miho servicio na pashentnan
HOSPITAL TA ACTUALISA SU SISTEMA DI REGISTRACION
Un sistema automatico pa haci proceso di registracion na un forma mas profesional
Den su afan pa por sigui mehora su servicio na comunidad, Dr. Horacio E. Oduber Hospital a inverti den un sistema moderno, automatico y digital pa registra su pashentnan. Pa e sistema nobo aki por bay den ehecucion, ta necesario pa Hospital actualisa e sistema di registracion actual.
Tecniconan di e sistema di IT di Hospital hunto cu personal di departamentonan di cuido y di administracion ta trahando algun siman caba riba actualisacion di e banco di informacion y e programa completo pa registra pashentnan. Nan ta masha entusiasma cu e cambio aki, cu sin duda lo nifica un adelanto grandi den e procesonan cu ta tuma luga na momento di registra un pashent cu mester haci uzo di cualkier un di e servicionan cu Dr. Horacio E. Oduber Hospital ta brinda na pueblo.
Pero pa e sistema nobo y moderno aki por traha optimal, ta necesario pa saca e sistema actual for di servicio un rato. Esey lo sosode riba dia 18 pa 19 di juni proximo entre 12or di anochi pa 6or di mainta.
Ta bon pa informa nos comunidad cu e proceso di actualisacion aki lo no afecta e cuido medico di e pashentnan, pero ta posibel cu procesonan administrativo, manera admision of registracion di pashentnan, lo por tuma mas tempo den e dianan cu ta sigui su tras. E personal atento cu ta traha cu e sistema nobo lo haci tur lo posibel pa evita mucho molester na e pashentnan.
Dr. Horacio E. Oduber Hospital ta convenci, cu asina e sistema nobo ta den ehecucion total, cu e nivel di servicio na pashentnan sin duda lo conoce un adelanto impresionante. Ta intencion di Hospital pa hisa su nivel di cuido na pashentnan, pero tambe e nivel di servicio mas ainda. Ta p'esey ta pidi un poco comprension y cooperacion di pashentnan den e dianan nos dilanti, si acaso e proceso administrativo tuma poco mas tempo cu custumber.
Hospital ta existi pa 34 aña caba y ta yama na nomber di e prome dokter Arubiano, Dr. Horacio E. Oduber. Anualmente Hospital ta brinda cuido na 18.000 pashent sea den forma di “opname of dagbehandeling”. Pa esaki e fundacion tin mas of menos 850 empleado den servicio, pa por brinda e miho cuido posibel. Siendo e unico Hospital riba nos isla, e fundacion ta consciente di su responsabilidad pa sigui traha duro pa supera expectativa di su pashentnan.