Dr. Horacio E. Oduber Hospitaal contento cu e profesionalismo brinda pa Policlinica pa diabetes

 

Na Aruba tin hopi hende cu ta sufri di e malesa di diabetes y segun añanan a pasa e totalidad di pashent a subi bastante. Dr. Horacio E. Oduber conhuntamente cu dokter Arjen Hoogendam, Internista y Specialista vascular, a cuminsa desde aña 2009 pa e motibo aki cu un Policlinica specialmente pa pashent cu ta sufri di e malesa cronico yama diabetes. Un clinica cu ta atende cada pashent cu hopi atencion na momento cu Dokter di cas constata y referi e pashent cu ta sufri di diabetes tipo 2.  

 

E meta di Policlinica pa diabetes ta primordialmente pa duna cada pashent un tratamento integral cu no por ser constata bon pa un Dokter di cas. Esey ta principalmente pa e pashent cu diabetes tipo 2 cu ta bay e Policlinica pa diabetes pa un temporada cortico di mas o menos 3 luna. Y unabes e pashent tuma control di su bida e ta cla pa regresa cerca su Dokter di cas.

 

Pero prome cu sigui duna informacion tocante e meta y trabou di e Policlinica pa diabetes ta importante pa splica e diferencia entre diabetes tipo 1 y tipo 2. Na momento cu bo scucha cu un hende tin diabetes tipo 1 esey kiermen cu e pancreas di e persona a stop di produci insulina. Tipo 2 sinembargo tin mucho mas di haber cu sobre peso y pa es motibo tin un falta di insulina pa mantene e sucu den bo sanger abou. Y si no atende e malesa cronico na tempo bo por haya complicacion cu por yega te na amputacion di pia, dialisis of perdemento di bista.

 

E tratamento pa diabetes ta primordialmente pa preveni daño a largo plaso na diferente organo cu ta bo pianan, bo riñon y tambe bo wowonan. Pa preveni tur esey ta importante pa conoce e malesa bon y siña con pa biba miho cu ne. P’esey cada pashent ta ricibi bon informacion na Policlinica pa diabetes. Y locual no por falta ta e uzo corecto di remedi cu bo ta ricibi di dokter.

 

Unabes bo yega Policlinica pa diabetes bo lo haci un ‘intakegesprek’ cu e specialista na unda lo haci tambe un chekeo total. Tambe lo bo ricibi tur informacion necesario pa bo tratamento y alabes lo señala si tin algun daño haci na un di bo organonan. Siguidamente lo traha diferente cita cu e enfermera specialisa riba e tereno di diabetes na unda lo duna atencion na estilo di bida, e malesa, e diferente complicacionnan y con por preveni pa haya esakinan. ­

 

Segun dr. Hoogendam “nos di Policlinica pa diabetes ta aspira cu despues di 3 luna a determina un bon tratamento y alabes cu e pashent a tuma control di su mesun bida. Si mester menciona cu hopi pashent ta cuminsa bin consulta y despues di algun cita ta stop cu esaki y ta regresa despues di mei aña atrobe. Nos ta ofrece un pakete di cuido completo y ta pa es motibo ta importante pa cada pashent caba cu e trayectorio completo”.

 

Hospital ta sumamente contento cu e profesionalismo di e Policlinica aki y alabes e exito cu ya a cosecha caba entre e pashentnan cu ya a bishita nan. Y mirando cu e pashent ta central pa dr. Horacio E. Oduber Hospital ta spera cu den futuro por integra cu e prome linea di cuido, por ehempel Centro Diabetico y alabes por brinda ayudo 24 ora pa dia.