Jessy posted on May 12, 2011 16:07
Tema di e aña aki tabata “Confia Enfermeria cu Bo cuido”
Hospital a celebra Dia di Enfermeria na forma grandioso
Cuminsando 9 di mei te cu 12 di mei cu ta Dia di Enfermeria a celebra e bunita profesion di Enfermeria. Un profesion sumamente importante pa e cuido di cada pashent cu ta drenta Hospital diariamente. A duna atencion durante 4 dia na cada persona cu ta haci e cuido di e pashent uno exitoso preparando un programa yena di actividad.
Ariba dialuna a tuma luga e apertura oficial na unda Dr. Richard Visser, Minister di Salubridad y Deporte conhuntamente cu Dr. Arnoud Boesten, Hunta di Directiva di Hospital, Gerardo Oduber, representante di Hunta di Supervision y Elvia Tromp, Enfermera di Intensive Care a subi e bandera di Aruba y e bandera di Dia di Enfermeria. Alabes a pasa paden pa asina Minister Visser y Dr. Boesten conhuntamente cu Julienne Garcia, enfermera di Dialisis a corta e sinta di e exposicion di e obranan di Arte cu a ser entrega pa diferente artista.
Diaranson pa prome biaha a duna e publico di Aruba e oportunidad pa pasa Hospital y duna idea con pa mehora e servicio di Hospital. Un publico bastante grandi a acudi entre 8.30or di mainta y 3.30or di atardi. Nan a aña oportunidad pa sinta cu un enfermero y a duna nan ideanan.
Riba Dia di Enfermeria, Hunta di directiva a organisa un desayuno special pa tur trahado di Hospital cu anualmente ta traha duro pa e pashent. Un desayuno extenso na unda cada miembro di personal di Hospital a gosa un rato ameno den compania di colega.
A cera e celebracion bunita aki cu e otorgamento di premio di e Competencia di Arte cu Hospital a organisa cu e pregunta pa refleha den un obra di arte e imagen di enfermeria. Hospital ta sumamente orguyoso cu e acogida cu a ricibi y ta manda un pabien pa e ganadonan di e diferente categorianan.