Jessy posted on november 16, 2010 17:37
Hunta di directiva di Hospital ta extende palabra di felicitacion pa e bunita trabou
Ayera a celebra dia di Enfermeria Specialisa den cuido di mucha
Dia 16 november 2010, nos enfermerianan specialisa den cuido di mucha, tabatin e honor pa celebra e bunita dia aki.
E meta, pa nos enfermeronan specialisa den cuido di mucha, ta lo siguiente:
· Duna cuido en general na muchanan, recien naci te na edad di 14 aña. E contacto y cuido profesional di e enfermeria, ta cuminsa na momento di admision di e mucha, hunto cu su mayornan of e persona responsabel pa cu e mucha.
· Duna e cuido specifico, na nos muchanan recien naci cu problema di salud of cu a nace prematuro. Caminda ta necesario ta stabilisa, optimalisa y observa señalnan vital. Specialmente den casonan manera di muchanan recien naci of prematuro den halto riesgo of ta hasta teme pa nan bida. Caso asina, mester tin conocemento di cierto materialnan y aparatonan tecnico.
· E proceso ta pa coordina cuido di e mucha den su totalidad, cu ayudo di otro specialistanan cu tin conocemento di mucha pa medio di e saminacion necesario.
Vision departamento di cuido pa mucha.
Duna e mucha un cuido optimal y di calidad, guia y sostene e mucha y su mayornan y/of e persona responsabel pa e mucha unda e mucha su derechonan semper ta na prome luga. Na mes momento ta duna conseho pa e continuacion di e cuido di e mucha.
Un personal entusiasma y amabel cu por tuma responsabilidad pa e cuido di e mucha y alabes cu mes entusiasmo y disposicion sigui e desaroyonan di cuido di mucha y tecnologia cu tin di haber cu cuido di mucha.
Mision departamento di cuido pa mucha
Duna un ambiente placentero na estadia di e cliente cu ta e mucha. Mantene un ambiente alegre pa cu demas colega y ayudantenan. Brinda un cuido specifico na e muchanan cu problemanan fisico y emocional. Traha cu e cliente ta keda central. Mayornan y/of e persona cu ta responsabel pa cu e mucha semper wordo involucra den e cuido necesario. Ademas di saminacion y cuido nos ta duna conseho, informacion y sosten na e mucha y su mayornan. Nos meta ta pa duna un cuido profesional y di calidad. Nos ta sostene tur metodo innovativo cu ta yuda den mehora e comodidad pa cu e cliente. Nos ta traha hunto pa tin un departamento organisa cu clientenan interno y externo satisfecho y contento cu e cuido y trato di calidad duna den ambiente agradabel.
En conexion cu dia di mucha 20 november 2010
WOWO DI UN MUCHA
Den wowo di un mucha
bo por lesa
kico e kier bisa bo
Wowo cu ta briya
manera cielo blauw
Cu ta pone bo
bula di alegria
E rayonan di su wowo
ta bunita
Y ta yena nos
di alegria
Su wowonan ta pone nos
para keto
Y realisa pakico nos
mester duna un mucha
hopi cariño
E wowo di e mucha
ta laga mi wak
y sinti
sin cu mi tin duda
kico e kier bisa mi
Enfermeronan di departamento di mucha di hospital ta desea tur mucha PABIEN riba nan dia.
Dios proteha y drama su bendicion riba nos muchanan.