hoh-admin posted on juni 14, 2009 08:43
E trabounan di renobacion di e cambernan di operacion di Hospital ta practicamente tras di lomba. Tur e trabounan a keda efectua den un tempo record, loke ta haci un i tur embolbi cu e proyecto aki hopi orguyoso.E systema di filter di aire dden tur e cambernan di operacion awor ta funciona segun e normanan vigente. Tur e flurnan a keda cubri cu un tipo di vinyl specialmente pa cambernan di operacion, eleminando electricidad statico. Un cantidad di trabou di mantencion y verfmento a keda completa y tur instalacion di coriente ta modernisa. Tambe Hospital tin riba OK awor e posibilidad pa prepara pashent cu anestesia prome cu operacion den dos espacio specialmente ekipa pa esaki. Tambe un magazijn sera special pa warda material anestesiologico. Gran parti di e trabou pa acaba tur e pida cosnan cu falta, lo tuma lugar mas pronto posibel y fuera di ora di oficina.
E cultivonan di aire di e dos prome cambernan di operacion cu a keda renoba, ta mustra un calidad considerabelmente mas halto cu esnan prome cu esei. Di e resto di e compleho di camber di operacion no tur resultado ta conoci ainda, pero aki tambe tij indicacion cu tin mehoracion compara cu e situacion bieu.
Manera ta conoci, a scohe pa efectua e trabounan di renobacion di henter e compleho di OK. Esei a nifica cu mester a busca formanan alternativo pa opera pashentnan di urgencia durante e periodo aki. A logra solucion pa esaki danki na un cooperacion estrecho cu dagverpleging, verloskamer y laboratorio. Pa motibo di e renobacion nos a keda falta na cierto momento tres camber di operacion. Nos tabata conciente cu den un caso di calamidad, nos lo no tabata tin suficiente camber di operacion na nos disposicion. Pa e motibo aki a crea un compleho di operacion di reserva riba departamento di endoscopie, cooperacion cu a cana di un forma sumamente placentero. Sin e dedicacion y flexibilidad di full e personal di OK y particularmente di e zorgmanagernan di anestesie y chirurgie, nos lo no por a termina e projecto di e forma aki. E specialistanan ciruhano, docternan di mucha y anestesiologonan naturalmente tabata tin di aber cu e consecuencianan di sera e unico compleho di OK cu Aruba ta dispone di dje. Sinembargo tanto den e fase preparatorio como den e fase di renobacion tabata reina un actitud flexibel den cual tur hende tabata yuda pensa tambe.
Prome cu fin di e aña aki nos lo tin un camber di operacion cu ta cumpli cu e standardnan mas recien pa loke ta trata cirugia di prothesis.