hoh-admin posted on juni 18, 2009 08:41
Na Aruba tin un indice di mortalidad neonatal demasiado halto. Esaki ta un di e conclusionnan principal cu sali di un investigacion encuanto morbididad y mortalidad neonatal na Aruba. E investigacion aki, cual a tuma lugar den e periodo di 2005 y 2007, tabatin como meta haya un bista di e morbilidad perinatal na Aruba y bou babynan recien naci cu ta wordo transporta y haya un bista den e enbergadura di e problema di transportacion, inventarisa e posibilidadnan pa mehoracion di e cuido perinatal na Aruba, y yega na recomendacionnan pa realisa mehoracion.
Un otro conclussion di e investigacion aki tabata cu tin un cantidad demasiado halto di parto cesario y un cantidad demasiado halto di embaraso hubenil na Aruba. E indice di mortalidad perinatal ta mas halto cu na Hulanda y por wordo compara cu Sur-America y Europa Oriental. Factornan cu posibelmente ta hunga un rol ta parto cu cesario, embarasonan hubenil ta e calidad di cuido obstetrico na Aruba y e calidad di cuido perinatal na Colombia. E transportnan perinatal ta conduci na un parti grandi di e mortalidad neonatal. Expansion di e posibilidadnan neonatologico na Aruba y un centro perinatologico mas cerca di cas cu ta cumpli cu e exigencianan di awendia, ta di ta di gran importancia pa nos isla, di acuerdo cu e investigacion.
Como cu Aruba ta chikito, hospital di Aruba no ta dispone di un unidad di cuido intensivo neonatal. Pa motibo di su posicion geografico babynan recien naci cu ta sufri di malesanan grave mester bai cu transporte aereo prome (transport intra-uterien of IUT) of despues (transport neonatal of NT) di parto pa tratamento den exterior, principalmente pa Colombia.
E metodo cu a aplica den e investigacion aki ta unu retrospectivo, cual a tuma lugar den e añanan 2005-2007. A colecta datonan di 162 baby recien naci:
- 66 recien naci (di 58 embaraso) cu a nace den exterior despues di IUT (11 a fayece)
- 31 recien naci manda pa exterior pa medio di NT (10 a fayece)
- 49 baby cu a nace morto despues di un termino di embaraso di 22 siman
- 16 recien naci cu dentro di 28 dia despues di parto a fayece na Aruba.
E resultadonan di e investigacion a mustra un indice promedio di nacemento na Aruba di 13.2‰. E incidencia promedio di parto cerca teenagernan tabata forma 12% di e total. Di e muhernan 64% a duna lus normal y 34% pa medio di cesario; vacuüm of forceps (2%) tabata sumamente excepcional.
Transporte Intra-uterien tabata tuma lugar specificamente pa Colombia (90%), transporte neonatal pa Colombia (60%) y Corsou (30%). E duracion promedio di embaraso y peso di e baby cu a nace despues di IUT tabata respectivamente 30 siman y 1300 gram; di babynan recien naci cu NT esaki tabata respectivamente 34 siman y 2600 gram. E mortalidad despues di IUT tabata 17% y despues di NT 32%. E diagnosis cu mas frecuencia tabata IRDS (67%) y sepsis (44%); cerca 16% tabata tin defectonan fisico congenital.
E indice di mortalidad pa Aruba tabata como lo siguiente:
- Mortalidad Perinatal: >22 siman 18‰, >24 siman 15‰, >28 siman 11‰.
- Mortalidad di Fetus: >22 siman 12‰, >24 siman 9‰, >28 siman 5‰
- Mortalidad Neonatal: <7 dia 7‰, 7-28 dia 1‰, 0-28 dia 8‰.
Mas cu mitaR (52%) a muri den exterior, principalmente a consecuencia di prematuridad (71%) of defectonan fisico congenital (24%).