hoh-admin posted on juli 09, 2009 08:39
Hunta di Directiva di Hospital Dr. Horacio Oduber kier a informa pubkico di lo siguiente. Manera indica durante di e conferencia di prensa di diadumingo 5 di juli ultimo, Hospital a tuma un seri di medida di precaucion despues cu a haña sospecho cu un empleado di e departamento di pediatria (Kinder afdeling) ta infecta cu e virus H1N1. Manera anuncia, mesora a tuma tur medida di precaucion na dicho departamento, dor di isola, test y duna tratamento na tres pacient cu tabatin contacto directo cu e empleado, pero tambe dor duna tratamento na otro empleadonan di e departamento cu a bini den contacto directo cu e empleado aki. Tur e medidanan di precaucion aki a keda tuma conforme regla y protocolnan cu Hospital ta aplica den tipo di casonan asina.
Awe Hunta di Directiva di Hospital ku beneplasito kier informa publico cu resultado di testnan cu a bai Hulanda di tanto e empleado encuestion, pero tambe di e tres pacientnan menciona a sali negativo. Cu otro palabra, e empleado encuestion NO ta infecta cu e virus H1N1. Por lo tanto e pacientnan, como e demas empleadonan di e departamento di pediatria tampoco a keda expone na posibel infeccion cu e virus aki.
Hospital Dr. Horacio Oduber ta keda vigila e situacion di pandemia cu hopi atencion y lo sa di tuma e medidanan di seguridad y di precuacion na momento cu esaki bira necesario.