hoh-admin posted on augustus 10, 2009 08:37
Relaciona cu algun publicacion den medionan di comunicacion local encuanto e maneho di personal di Hospital Dr. Horacio Oduber, lo siguiente. Pa Hospital Dr. Horacio E. Oduber, dunamento di cuido di un forma responsabel ta para central. Mehoracion constante di e calidad di cuido ta un criterio importante den ponemento di prioridad pa loke ta projecto y inciativanan di maneho di nos instituto. Hospital ta brinda un cuido riba un base efectivo y conciente pa loke ta gastonan, door di un personal bon entrena y bon motiva
Dunamento di cuido di un forma responsabel ta exigi tambe alocacion di personal specialisa den e distinto departamentonan di Hospital. E maneho di personal di Hospital ta ensera e principio cu ora ta recluta personal, semper ta haci esaki riba mercado lokal prome. Reclutacion di personal den exterior ta sosode solamente den caso cu no por yena e vacaturanan cu hendenan di Aruba. Esaki naturalmente ta ensera cu ta nombra personanan den e funcionnan pa cual nan tin e calificacion y experiencia necesario. Ta di compronde cu si no haci esaki, e calidad di cuido na pacientnan ta sufri e concecuencianan di forma directo. Semper ta embolbi mas cu un persona den e proceso di seleccion di personal pa ocupa vacaturanan den Hospital, mientras cu den hopi caso ta haci uso tambe di expertisio di oficinanan profesional na Aruba pa haci e asina yama “assesment” di e candidatonan pa ocupa e distinto vacaturanan. Etnicidad y/of background na NINGUN momento ta hunga un rol den esaki. Mas bien ta bay pa “ the right man on the right place”. Despues cu nombra e persona den e funcion, ta sigui un trayecto den cua ta sigui desaroyo di e empleado di acerca y caminda ta necesario, ta tuma e pasonan pa mehora su funcionamento.
E scarcedad di personal medico y di enfermeria specialisa na Aruba ta un fenomeno bon conoci pa tur hende. Ta p’esey Hospital ta inverti pa aña mas cu 1 mion florin den formacion di su empleadonan. Den esaki ta pone enfasis riba inversion den specialisacion di enfermeronan, desaroyo di productionan di educacion y programanan di capacitacion pa miembronan di gerencia di Hospital. Pa e ultimo aki ta pone hopi atencion riba desaroyo di liderasgo y habilidadnan di ‘coaching”.
Tur esaki cu e unico meta pa brinda un cuido medico responsabel na pueblo di Aruba y na e miles di bishitantenan cu tur aña ta yega nos isla. Esaki pa Hospital Dr. Horacio Oduber ta muchu mas cu un ambicion. E ta un mision cu tur dia e mas cu 820 empleadonan di hospital ta realisa cu hopi amor y dedicacion.