hoh-admin posted on september 15, 2009 08:34
Empleadonan di e seccion di sikiatria di Hospital (PAAZ), actuando di un forma hopi rapido y atento a evita cu un incendio chikito causa pa un pacient a desaroya den un situacion potencialmente desastroso.
Tabata den careda di cuarto pasa di dos merdia cu personal di secretaria di PAAZa haci e melding cu tin masha hopi huma ta sali for di area unda e cambernan di isolacion ta ubica. Personal di PAAZ kendenan ta miembro di e team di emergencia di Hospital (HVT) mesora a drenta den accion y a logra paga e candela den apenas 2 minuut y mei. Na mes momento otro miembronan di e personal di PAAZ a evacua e pacientnan cu tabata interna den e cambernan aki y hiba nan na un lugar safe.
Investigacion cu a haci inmediatamente despues cu a domina e situacion a saca afor cu un pacient cu tabata interna den un di e cambernan di isolacion pa motibonan cu ainda no ta muchu cla, a cende colchon y cortina di e camber unda e tabata na candela. E incendio aki, aunke di un embergadura chikito, a causa un enorme desaroyo di huma den e parti aki di e edificio di PAAZ.
Hunta di Directiva di Hospital ta hopi contento cu empleadonan di Hospital mes a logra domina e incendio rapidamente y pa medio di nan actuacion rapido, a logra evacua e personanan interna den e seccion aki, sin cu ningun hende a haña herida of sufri complicacion causa pa inhalacion di huma. Riba e foto por mira e camber unda e incendio a tuma lugar.