Hunta ta Directiva di Hospital Dr. Horacio Oduber a bai di acuerdo pa nombra Wesley Reyes, Victor Kock, Manuel Santos, Edwin Todd, Paul de la Cruz y Steven van den Oever, nan tur empleadonan di PAAZ, como empleado di luna SEPTEMBER 2009 di Hospital. Ta pa prome biaha cu ta scohe mas cu 1 empleado como “empleado di luna” di Hospital. E 6 empleadonan aki di un forma excepcional a logra domina e candela y tambe di un forma rapido logra evacua pacientnan interna den e seccion di isolacion di PAAZ na cuminsamento di luna di september ultimo.
Manera ta conoci, danki na intervencion rapido di e empleadonan aki, a logra domina e candela den apenas dos minuut y mei, evitando consecuencianan mas serio.
Presidente di Hunta di Directiva, dr. Arnoud Boesten a dirigi palabra di gratitud y aprecio na e 6 empleadonan ehemplar aki, apreciando e loke nan a haci. Tambe a haci entrega di un certificado y un regalo den forma di entrada pa dos persona na Palm Island, tur cos inclui.
Riba e foto por mira e 6 empleadonan di luna, den compania di señora Ineke Hartmans, manager di PAAZ y tambe presidente y miembro di Hunta di Directiva, dr. Arnoud Boesten y Fernando Rigaud. MASHA PABIEN na e 6 empleadonan aki!