No ta nesesario mas registra prome bishita pacient na Hospital

Hunta di Directiva di Hospital Dr. Horacio Oduber, despues di a consulta cu su departamentonan interno manera Hygiena y Prevencion di Infeccion y tambe spescialista di pulmon a disidi pa entrante dialuna 12 di october pa stop cu registracion di bishitante prome cu nan subi pa bishita pacientnan interna den hospital. Entrante e fecha aki no ta necesario mas pa registra nomber y tuma carchi prome cu subi riba piso pa bishita un pashent. Sinembargo, e orario di bishita di cada biaha 1 (un) hora, esta di 12’or pa 1’or di merdia y 7’or pa 8’or di anochi ta keda vigente.

 

Manera ta conoci, algun luna pasa Hunta di Directiva di Hospital, den palabracion cu autoridadnan di salud publico na Aruba a sididi pa embista di e situacion di pandemia causa pa e virus H1N1 (cu ta causa griep di porco), introduci un serie di medida pa evita cu ta haña aglomerashon di hopi hende den camber y salanan di cuido y otro areanan di Hospital. Aunke ainda e situashon ta keda unu di alerta, toch Hunta di Directiva a opta pa, aunke ta di forma temporal, suavisa e medidanan aki.

 

Hunta di Directiva di Hospital ta haci un apelacion fuerte riba tur hende cu tin famia, amigo of conocir den Hospital pa limita mas tantu posibel e cantidad di persona cu ta bini Hospital pa bishita un pashent. Esaki no solamente enbista di e situacion di alerta relaciona cu ‘griep di porco’, pero tambe considerando e proseso di recuperacion di e pacient mes. Ta un echo cu mas sosiego un pacient haña, mas lihe e proceso di recuperacion ta bai. Hospital lo tene vigilansia ariba e pisonan unda tin pacient interna y caminda ta necesario lo mustra e bishitantenan tambe riba e necesidad pa evita aglomeracion di hende den camber y salanan di cuido.