hoh-admin posted on October 22, 2009 08:06
Pa prome biaha ta tuma lugar aki na Aruba un asina yama “ATLS-course (Advanced Trauma Life Support), loke ta nifica un “curso avansa pa scapa bida den caso di accidente cu trauma como consecuencia. Un total di 20 docter di Aruba, afilia na tanto Hospital Dr. Horacio Oduber, como Instituto medico San Nicolaas (IMSAN) lo participa na e curso aki, cual lo tuma lugar riba dianan 24 y 25 di october durante henter dia na Hospital.
ATLS ta un curso post-doctorado specialmente pa docternan activo riba medicina di emergencia. E ta un curso hopi importante pa docternan cu ta duna tratamento di prome auxilio na personanan cu bira victima di trauma. Enfermeronan specialisa y personal di sosten riba e tereno aki lo participa na e curso como observador. ATLS ta un protocol pa specialista y enfermeronan cu ta trata trauma pa empodera nan tuma e decisionnan corecto ora esaki ta necesario. E protocol ta indica di un forma cla cual ta e prioridadnan y ta un tremendo sosten den situacionnan caotico cu por surgi ora ta trata victimanan di trauma. Ta trata di un sistema desaroya na Merca, pero cu ta worde usa na 50 pais rond mundo como e standaard con trata personanan cu bira victima di trauma.
Docternan cu sigui e curso aki ta haña un certificacion cu un duracion di 4 aña. Despues di e 4 añanan aki e docter mester sigui un curso di nobo, pa e por mantene su certificacion. Tin algun medico na Aruba cu ya caba a sigui e curso aki y ta posee e certificacion. E docternan aki lo no participa na e curso. Tin un grupo di medico cu lo participa na e curso aki pa mantene nan certificacion, mientras cu tin otronan cu lo participa pa prome biaha. E curso di dos dia ta termina cu un examinacion oral y por escrito.
E curso cu lo tuma lugar e fin di siman aki ta sosode bou di auspicio di The American College of Surgeons di Chicago. Organisacion di e curso aki a tuma lugar den cooperacion cu organisacionnan di ATLS di Chicago y di Colombia. Den e cuadro aki lo bini un total di 7 specialista medico for di exterior, di cual e director di e curso, kende ta dr. Pogetti, prosedente di Brazil y tambe 6 medico-specialista cu lo bini for di Colombia, entre nan coordinador di e curso, dr. Londoño. Hunto cu e manager di cluster diagnostica y medicina di sosten, señora Edith Gommers y un team coordinador di Hospital Dr. Horacio Oduber, consistiendo di docter Deepu Daryanani (Cirugano/hefe medico di Departamento di Emergencia), señor Ruben Croes (Manager di Departamento di Emergencia), Frans Figaroa (coordinador di educacion y enseñansa) y señora Zulay Harms-Reenis (secretaria di unidad di educacion y enseñansa) a hinca e curso aki di un forma sublime den otro.