hoh-admin posted on november 07, 2009 12:49
Diadomingo dia 8 di november mundialmente personanan cu ta traha den ramo di radiologia a celebra “Dia Mundial di Radiologia”. E aña aki ta conmemora e echo cu 104 aña pasa, Wilhelm Conrad Röntgen a discubri e asina yama rayonan “röntgen”, conoci tambe como “rayonan X”. Apenas tres luna despues di e descubrimento aki na 1895, a cuminsa aplica rayonan “röntgen” den medicina como instrumento di yudansa pa haci diagnostico.
E sociedad internacional di Tecniconan di Radiografia y Radiologia (International Society of Radiographers and Radiological Technologists, ISRRT) tur aña atrobe ta encurasha personanan activo den e ramo aki pa celebra e gran descubrimento aki. Esaki como iniciativa pa amplia conocimento y stimula interes pa e profesion di radiologo y/of tecnico di radiologia. E aña aki a scohe como tema “Radiologonan ta ocupa nan mes cu bo proteccion” (Radiographers Care About YOUR Protection).
Aplicacion di radiologia den diagnostico ta algo cu ta sosode di forma extenso na Hospital Dr. Horacio Oduber. Pa dia ta tuma lugar centenar di aplicacion, intervencion y tratamento di radiologia. Esakinan ta varia di e ‘sacamento di potret’ tradicional te MRI y tambe CT-scan.
Personal di Departamento di radiologia di Hospital riba e dia aki tabatin un actividad conhunto na Palm Island. Hunta di Directiva di Hospital, pa medio di e comunicado aki kier a felicita tur trahador di e departamento importante aki relaciona cu dia mundial di radiologia.