hoh-admin posted on juni 10, 2009 08:49
Hunta di Directiva di Hospital Dr. Horacio Oduber, conhuntamente cu departamento di hygiena y prevencion di infeccion, staf di departamento di pediatria y otro departamentonan relevante a dicidi pa tuma un seri di medida di precaucion na departamento di pediatria (Kinderafdeling) enbista di un posibel contaminacion di bruela (waterpokken) cu a bin di pafor di Hospital na e departamento aki.
A dicidi pa tuma e medidanan di seguridad aki despues cu a constata posibel contaminacion door di un pacient cu a keda interna den e departamento aki.
E medidanan di seguridad encuestion ta ensera entre otro cu ta duna babynan recien naci cu ainda ta interna na e departamento aki remedinan special pa evita e malesa di bruela, mientras cu esnan cu a bai cas caba tambe ta ricibi tratamento cu e remedinan special aki. Tambe ta conduciendo testnan pa determina contaminacion cu e virus di bruela cerca miembronan di staf di e departamento, pacientnan cu a bai cas caba y tambe nan mayornan.
Hospital tin indicacion cu na e momentonan aki tin varios persona na Aruba cu ta infecta cu e virus di bruela. Enbista di esaki Hospital kier a pidi tur hende cu mester bishita Hospital y cu ta sospecha cu nan ta infecta of ta infecta cu bruela pa NO bishita Hospital, evitando asina mas contaminacion di pacient of personal di Hospital cu e malesa aki. Tambe personanan cu mester haci un test policlinico (saca potret, MRI, endoscopia, test curason, etc.,), y kendenan tin sospecho cu nan ta infecta of tin bruela, pa tuma contacto telefonico cu e departamento unda nan mester bay pa informa nan di esaki y pa traha un cita nobo. Esaki pa evita cu nan tin di bishita Hospital.