hoh-admin posted on juni 12, 2009 08:47
Dia 14 di juni ta proclama internashonalmente como dia pa felicita y jama danki na tur donantenan fiel di sanger, kendenan ta duna sanger regularmente pa salba bida di otro. Den algun caso, un biaha pa aña, mientras cu tin otronan cu ta duna sanger hasta 4 bes den un aña.
Mundialmente, y sigur aki na Aruba tin hopi hende cu ta debe nan bida na hendenan cu probalemente nunca nan lo topa cunele of sera conoci cune. Hendenan cu voluntariamente y sin pago ta regala nan sanger.
Ta un hecho sinembargo cu e mayoria grandi di e populacion mundial no tin acceso na sanger “safe” y sin riesgo. Banda di esey tin hopi pais den cua e pacient ta depende di familia of amigonan cu mester duna sanger. Of tambe otro paisnan unda ainda ta paga pa donacion di sanger. Contrali na esakin na Aruba sanger ta worde duna 100% gratuitamente y voluntariamente.
Rond mundo ta evidente cu donante voluntario y sin pago ta e fundeshi di proveedornan di sanger, ya cu nan te esun menos probable pa transmiti malesanan potencial cu riesgo di contaminacion di infeccion cu resultado fatal. Manera por ehempel HIV y virus di Hepatitis. Pa e motibo aki ta dedica World Blood Donor Day na e heroenan deconoci y silencioso.
Ta di spera cu aki na Aruba tambe World Blood Donor Day lo crea of amplia e conciencia pa e importancia di donacion di sanger voluntario y stimula otronan den comunidad pa bira donante di sanger. Ta nos speransa tambe cu un generacion nobo por sigi e ehempel aki, percurando pa e sanger mas safe pa ken sea cu e ta y ki ora cu ta necesario pa salba bida.