hoh-admin posted on juni 14, 2009 08:45
Hunta di Directiva, staf, empleadonan di Hospital y un gran cantidad di invitado for di tur sector di comunidad arubano diabierna dia 5 di juni a bini hunto pa tuma despedida di señora docter Maria Louise van der Griend-Odijk, conoci pa un y tur na Aruba como Docter Odijk. Despues di e traha casi 40 aña den ramo di medicina na Aruba, Docter Odijk lo bai gosa di un pensioen bon mereci.
Presidente di Hunta di Directiva di Hospital, dr. Arnoud Boesten, den su discurso a tira un bista bek riba carera di Docter Odijk, kende a cuminsa como anestiologo na Hospital San pedro de Verona. Despues di hopi aña den e ramo aki, Docter Odijk a pasa pa otro departamentonan di Hospital, entre otro ‘pre-screening’, director medico interino y funcionario di keho, funcion cu te ultimo aki e la ocupa na satisfaccion di tanto esnan cu ta entrega keho como mundo medico mes.
Como reconocimento pa su trabou incansabel na interes di pacientnan, Hospital Dr. Horacio Oduber a institui un galardon special pa Docter Odijk cu a haña e nomber di “Vlam di Dedicacion”. Su excelencia minister di enseñansa, asuntunan social y infrastuctura, señora drs. Marisol Lopez Tromp a haci entrega di e galardon aki na nomber di gobierno y pueblo di Aruba. Ta intencion pa e galardon aki, cu for di awor lo yama “Galardon Docter Odijk”, keda entrega tur aña na persona, organisacion of instancia cu mas a haci nan mes meritorio riba tereno di cuido pa pashent.
Docter Odijk mes a gradici un y tur cu durante e casi 40 aña a coopera cune y a haci su estancia aki na Aruba y su trabou na interes di pacientnan di Aruba unu sumamente placentero. Hunta di Directiva, staf y personal di Hospital ta desea Docter Odijk un pensioen yena cu salud, trankilidad y bendicion.